Халқаро миқёсда жиноий активларни қайтариш ва улардан фойдаланиш бўйича ўқув тренинги ўтказилди

Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғи (ARIN–WCA) Котибияти вазифасини амалга ошириши доирасида БМТнинг Гиёҳвандлик ва жиноятчилик бўйича бошқармаси билан ҳамкорликда мазкур тармоқ аъзо давлатлар вакиллари учун “Халқаро миқёсда жиноий активларни қайтариш ва улардан фойдаланиш” мавзусида уч кунлик ўқув тренинги ташкиллаштирди.

Мазкур тренинг онлайн шаклда, тармоққа аъзо ҳамда кузатувчи бўлган – Афғонистон, Озарбайжон, Покистон, Тожикистон, Туркманистон, Украина, Ўзбекистон, Қозоғистон, Қирғизистон ва Эрон мамлакатларидан активларни (мулкларни) қайтариш ва бошқаришга масъул бўлган ваколатли давлат органларининг 30 дан ортиқ вакиллари иштирокида ўтказилди.

АҚШ, Буюк Британия ва Гернси давлатларидан бўлган хорижий экспертлар тренинг иштирокчилари билан халқаро миқёсда жиноий активларни қайтариш ва улардан самарали фойдаланиш борасидаги ўзларининг ижобий тажрибаси ва илғор амалиёти билан бўлишишди.

Виртуал гуруҳларга бўлинган ҳолда уч кун давомида ҳамкорликда вазифаларни бажариш ўқув тренинги иштирокчиларига активларни қайтариш ва улардан фойдаланиш соҳасидаги қонунчилик ва уни амалиётда қўллаш борасидаги ўз тажрилари билан алмашиш, ушбу соҳадаги ёндашувлар ва янгиликлар билан танишиш имкониятини яратди.