Журналистларга нисбатан содир этилган жиноятлар бўйича прокурорлар учун тавсиялар

ЮНЕСКОнинг Ўзбекистондаги ваколатхонаси томонидан Халқаро прокурорлар ассоциацияси ҳамда Бош прокуратура Академияси билан ҳамкорликда прокуратура органлари ходимлари учун журналистларга нисбатан содир этилган жиноятлар бўйича тавсиялар ўзбек тилида ишлаб чиқилди.

Мазкур нашр ҳуқуқ соҳасидаги халқаро мутахассис, муқаддам Квебек шаҳри (Канада) Жиноий таъқиб бошқармаси лавозимида ишлаган Сабин Уэлле, шунингдек, БМТ махсус маърузачилари А.Калламард ва Л.Мальдонадо ҳамда Халқаро прокурорлар ассоциацияси, Халқаро адвокатлар ассоциацияси, Жиноий одил судлов ва инсон ҳуқуқлари бўйича Сиракуза халқаро институти ва бошқа халқаро ташкилотлар вакиллари муаллифлигида тайёрланган.

Ушбу тавсиялар прокуратура органлари ходимлари учун жиноий одил судловнинг турли босқичларида журналистлар ва бошқа оммавий ахборот воситалари вакилларига нисбатан содир этилган жиноятлар бўйича қўзғатилган ишлар юзасидан маслаҳат ёрдами кўрсатишга қаратилган.

Нашрда мазкур тоифадаги жиноят ишларини тергов қилиш ва судда давлат айбловини қўллаб-қувватлаш чоғида қонун устуворлигини таъминлаш, хусусан, жабрланувчи ва гувоҳлар ҳимояси учун алоҳида шароитлар яратиш, журналистик манбалар муҳофазасини таъминлаш, шунингдек, ўзаро ҳуқуқий ёрдам кўрсатиш борасида бир қатор тавсияларни ўз ичига олган.