Тергов фаолиятини такомиллаштириш масалаларига бағишланган халқаро конференцияда иштирок этилди

Ўзбекистон Республикаси Бош прокуратураси Академияси бўлим бошлиғи М.Палванов Минск шаҳрида бўлиб ўтган Беларусь Республикаси Тергов қўмитаси ташкил этилганлигининг 10 йиллиги ҳамда Беларусь Республикаси Тергов қўмитасининг Малака ошириш ва қайта тайёрлаш институти ташкил этилганлигининг 1 йиллигига бағишланган “Тергов фаолияти: илм-фан, таълим, амалиёт” мавзусидаги халқаро илмий-амалий конференцияда иштирок этди.

Тадбирда Беларусь Республикаси, Озарбайжон, Россия Федерацияси, Тожикистоннинг юздан ортиқ етакчи олимлари, давлат бошқаруви органлари вакиллари, ҳуқуқни муҳофаза қилувчи органлар ходимлари қатнашди.

Конференция жиноятларнинг олдини олиш ва фош этиш борасидаги илғор тажриба ва муваффақиятли амалиёт, жиноят ҳуқуқи ва процесси ривожланишининг замонавий тенденциялари, терговни криминалистик таъминлашнинг концептуал йўналишлари, суд-эксперт ва тезкор-қидирув фаолиятларини такомиллаштириш истиқболлари, шунингдек тергов органлари ходимларини тайёрлаш тизимини такомиллаштириш масалаларини муҳокама қилиш учун қулай имконият бўлиб хизмат қилди.

М.Палванов конференция очилиш маросимида кириш сўзи билан қатнашиб, тадбирнинг асосий қисмида «Прокурор-тергов ходимларини касбий қайта тайёрлаш ва уларнинг малакасини оширишнинг ўзига хос хусусиятлари» мавзусида маъруза билан иштирок этди.

Шу билан бирга, Тергов қўмитасининг Малака ошириш ва қайта тайёрлаш институтига ташриф жараёнида институт раҳбарияти билан маслаҳатлашув ўтказилиб, таълим муассасасининг моддий-техник базаси, ўқув жараёнининг ўзига хос жиҳатлари ҳамда криминалистик техникаларнинг намуналари билан танишилди.

Томонлар икки томонлама имзоланган келишув дорасида прокурор-тергов фаолиятининг долзарб масалаларига оид қўшма илмий тадқиқотларни ташкил этиш ва ўтказиш масалаларини муҳокама қилдилар.