Нелсон Мандела Халқаро кунига бағишланган давра суҳбати ўтказилди

Нелсон Мандела Халқаро кунини нишонлаш доирасида Ўзбекистон Республикаси Бош прокуратураси Академияси томонидан БМТнинг Гиёҳвандлик ва жиноятчилик бошқармаси билан ҳамкорликда жорий йилнинг 13 июль куни “Ўзбекистон Республикасида жиноят-ижроия қонунчилигини такомиллаштириш истиқболлари” мавзусида онлайн давра суҳбати ўтказилди.

Тадбирда жиноят-ижроия қонунчилигини такомиллаштириш соҳасида фаолият олиб бораётган вазирлик ва идоралар, илмий ва таълим муассасаларининг вакиллари ҳамда АҚШ, Европа, Қозоғистон
ва Қирғизистон Республикаларидан халқаро экспертлар иштирок этишди.

Давра суҳбати давомида иштирокчилар “БМТнинг Маҳкумлар билан муносабатда бўлишнинг минимал стандартлари – Нелсон Мандела қоидалари”ни тадбиқ қилиш, жазони ижро этиш тизимини такомиллаштириш борасидаги комплекс чора-тадбирлар, жумладан замонавий халқаро стандартлар ва илғор хорижий тажрибани инобатга олган ҳолда жиноят-ижроия қонунчилигини тубдан такомиллаштириш, маҳкумларнинг ҳуқуқлари, эркинликлари ва қонуний манфаатларининг ҳимоясини таъминлаш, COVID-19 пандемияси даврида маҳкумлар билан муносабатда бўлиш, пробация хизматининг ташкилий-ҳуқуқий асослари, қайта жиноят содир этилишининг олдини олиш мақсадида маҳкумларни ахлоқан тузатиш бўйича тарбиявий ишларнинг самарадорлигини ошириш масалалари ҳамда ушбу соҳадаги АҚШ, Европа ва МДҲ давлатларининг ижобий тажрибасини муҳокама қилишди.

Давра суҳбати иштирокчилари маҳкумларнинг ҳуқуқлари, эркинликлари ва қонуний манфаатларининг ҳимоясини янада кўпроқ таъминлаш мақсадида, жазони ижро этиш тизимини такомиллаштириш борасидаги ислоҳотларни давом эттириш лозимлигини таъкидладилар.