Бош прокуратура Академияси магистратурасига кириш имтиҳонлари

 2021 йил 29 август куни Тошкент ботаника боғи ҳудудидаги ёпиқ саҳна майдонида Бош прокуратура Академияси магистратурасига кириш ёзма имтиҳони бўлиб ўтди.

Магистратурага танлов “Юриспруденция” мутахассислиги бўйича олий юридик маълумотга эга бўлган шахслар, шу жумладан прокуратура органлари ходимлари орасида ўтказилади.

Академия магистратурасининг “Прокурорлик фаолияти”, “Тергов фаолияти”, “Коррупцияга қарши курашиш” ҳамда “Инсон ҳуқуқларига оид халқаро ҳуқуқ” мутахассисликлари бўйича 2021/2022 ўқув йилига 40 та қабул квотаси тасдиқланган бўлиб, 323 нафар номзод (шундан 220 нафар ташқи номзод) ҳужжат топширган. Айрим мутахассисликлар бўйича битта ўринга номзодлар сони 13 нафарни ташкил этди.

Ёзма имтиҳон чет тили бўйича тест саволлари ва ҳуқуқий мавзудаги эсседан иборат.

Имтиҳонни ўтказишда янгича ёндашув жорий этилиб, унга кўра, мутахассислик фанлари бўйича ёзма имтиҳоннинг янада шаффоф ва холис бўлиши, бу борада номзодларга тенг имкониятларни яратиш мақсадида номзодлар орасидан танланадиган вакил томонидан битта билет танлаб олиниши ва барча номзодлар ушбу билетдаги 4 та саволдан биттасига жавоб ёзиши назарда тутилган. Ушбу тартиб хорижий давлатларнинг нуфузли олий таълим муассасаларида кенг қўлланиб келинаётганлиги аҳамиятлидир.

Эссе мавзулари жиноят ҳуқуқи, жиноят-процессуал ҳуқуқи, фуқаролик ҳуқуқи ва фуқаролик-процессуал ҳуқуқи каби фанлардан тузилган бўлиб, номзод ўз билим ва қобилиятларини тўлақонли намоён этиши учун имтиҳон билетидаги ўзига энг яқин бўлган мавзуни танлаш имкониятига эга.

Миллий сертификат ёки халқаро сертификатларнинг В2 даражасига эга бўлган номзодларга чет тилидан имтиҳонсиз максимал балл берилади.

Кириш имтиҳонини холис, очиқ ва шаффоф ўтказилишини таъминлаш мақсадида:

– чет тили бўйича тест саволларини тузиш, имтиҳонни ўтказиш ва жавобларини баҳолаш учун Давлат тест маркази жалб қилинди;

– имтиҳон жараёни реал вақт режимида Бош прокуратура Академиясининг Фейсбукдаги расмий саҳифаси (www.facebook.com/ProsecutorAcademy) ҳамда тест синови жараёнларини онлайн кузатуви платформаси (test2021.uz) орқали онлайн тарзда трансляция қилинди;

– ёзма имтиҳонга, имтиҳон жавобларини текширишга ва суҳбат бўйича комиссия фаолиятига бошқа ташкилот ва идоралар вакиллари кузатувчилар ва мутахассислар сифатида жалб қилинди;

– имтиҳон билетлари автоматик тарзда электрон генерация қилинди;

– ҳар бир номзодга идентификацион рақам берилди ва имтиҳон жавоблари тўлиқ шифрланди.

Ёзма имтиҳон саволлари (эссе мавзулари) ҳамда суҳбат саволлари билетлари прокуратура Академиясининг расмий веб-сайтида олдиндан эълон қилинган (https://proacademy.uz/uz-cyr/news/view?alias=995).

Имтиҳон ўтказиладиган жойга киришдан олдин номзодларнинг тана ҳарорати ўлчаниб, ҳар бир номзод алоҳида тиббий қўлқоп ва ниқоб, сув, керакли канцелярия товарлари билан таъминланди.

Кириш имтиҳонининг суҳбат шаклидаги иккинчи босқичининг ўтказилиш вақти қўшимча тарзда маълум қилинади.