Zamonaviy tahdidlar va qonun ustuvorligi: Akademiyada global ekspertlar muloqoti

2025-yil 27–28-noyabr kunlari O‘zbekiston Respublikasi Huquqni muhofaza qilish akademiyasida “Zamonaviy chaqiriqlar sharoitida qonun ustuvorligini ta’minlash: muammo va yechimlar” mavzusida xalqaro ilmiy-amaliy konferensiya tashkil etildi. Tadbir Akademiya tashkil etilganining 3-yilligiga bag‘ishlanadi.

Konferensiya qonun ustuvorligini mustahkamlash, huquqni muhofaza qiluvchi organlar xodimlarining kasbiy kompetensiyalarini rivojlantirish, zamonaviy chaqiriqlarga qarshi kurashish va xalqaro hamkorlikni kengaytirishga qaratilgan to‘qqizta yirik xalqaro o‘quv va ilmiy-amaliy tadbirdan iborat akademik dekadaning yakuniy va asosiy tadbiri bo‘ldi.

Konferensiya Huquqni muhofaza qilish akademiyasi tomonidan GIZ, YEXHT, BMTning Giyohvandlik va jinoyatchilik bo‘yicha boshqarmasi (UNODC), ICITAP, MOM hamda boshqa xalqaro hamkor tashkilotlar bilan hamkorlikda gibrid formatda tashkil etildi.

Konferensiyada ishtirok etish uchun 34 davlatdan 49 nafar ekspert Toshkentga tashrif buyurdi, umumiy hisobda esa 120 dan ortiq xorijiy va xalqaro mutaxassislar qatnashdilar, bu esa xalqaro tashkilotlar va ekspertlar hamjamiyatining keng ishtirokini ta’minladi.

Konferensiya ishida AQSH, Buyuk Britaniya, Germaniya, Fransiya, Ispaniya, Niderlandiya, Turkiya, Kanada, Koreya Respublikasi, Malayziya, Marokash, Latviya, Qozog‘iston, Qirg‘iziston, Tojikiston, Ozarbayjon va boshqa qator davlatlar vakillari, shuningdek BMT, YEXHT, Yevropa Ittifoqi, Xalqaro prokurorlar assotsiatsiyasi, YUNESKO, YUNISEF, MASA, IACA va Xalqaro migratsiya tashkiloti kabi nufuzli xalqaro tuzilmalar delegatsiyalari ishtirok etdilar.

Konferensiya dasturi yalpi majlis va oltita parallel sessiyadan iborat bo‘lib, ular jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish, huquqni muhofaza qilish sohasida ta’lim va fanni rivojlantirish, korrupsiyaga qarshi kurashish, sun’iy intellektni huquqiy jihatdan tartibga solish, kiberxavfsizlikni ta’minlash hamda global migratsiya sharoitida inson huquqlarini himoya qilish masalalariga bag‘ishlangan.

Yalpi majlisda O‘zbekiston Respublikasi Bosh prokuraturasi, Oliy sudi, Inson huquqlari bo‘yicha Milliy markaz, Ichki ishlar vazirligi, Milliy gvardiya, Davlat bojxona qo‘mitasi, Korrupsiyaga qarshi kurashish agentligi, Oliy ta’lim, fan va innovatsiyalar vazirligi rahbariyati, shuningdek Oliy Majlis Senati vakillari so‘zga chiqdilar.

O‘z ma’ruzalarida ular huquqni muhofaza qilish tizimini modernizatsiya qilish jarayonida fan va ta’lim salohiyatining o‘rni, zamonaviy texnologiyalarni, jumladan sun’iy intellektni joriy etish zarurati, shuningdek transmilliy tahdidlarga qarshi kurashish uchun yuqori malakali kadrlar tayyorlashning ahamiyatini alohida ta’kidladilar.

Chet ellik ekspertlar muhokamalarga sezilarli hissa qo‘shdilar. Qozog‘iston va Qirg‘iziston huquqni muhofaza qilish akademiyalari rahbarlari kadrlar tayyorlash sohasida xalqaro hamkorlikni kengaytirish va tajriba almashishning dolzarb ahamiyatini qayd etdilar. Yevropa Ittifoqi, BMT, YEXHT va Xalqaro prokurorlar assotsiatsiyasi vakillari transmilliy jinoyatchilik, korrupsiya va terrorizmga qarshi kurashish, shuningdek inson huquqlarini himoya qilish sohalarida global hamkorlikni yanada mustahkamlash zarurligini ta’kidlab o‘tdilar.

Spikerlar Akademiyaning nisbatan qisqa muddatda erishgan yutuqlarini alohida ta’kidlab, kadrlar tayyorlash tizimini takomillashtirish, ilmiy-tadqiqot ishlarini faollashtirish va xalqaro hamkorlikni kengaytirish borasidagi natijalarni qayd etdilar. Akademiyaning jadal rivojlanishi qonun ustuvorligini ta’minlashga qaratilgan strategik vazifalarga to‘la mos kelishi ta’kidlandi.

Parallel sessiyalar doirasida jinoiy daromadlarni legallashtirishga qarshi kurashishda sun’iy intellekt va raqamli texnologiyalardan foydalanish, xalqaro axborot almashuvi mexanizmlarini rivojlantirish, barqaror kiberxavfsizlikni ta’minlash, elektron dalillar bilan ishlash amaliyotini takomillashtirish bilan bog‘liq masalalar atroflicha muhokama etildi. Shuningdek, xalqaro antikorrupsiya standartlarini joriy etish va sud-huquq faoliyatida sun’iy intellektdan foydalanishning axloqiy-huquqiy jihatlariga oid masalalarga ham alohida e’tibor qaratildi. Alohida sessiya migrantlar va odam savdosi jabrdiydalari huquqlarini himoya qilish, shuningdek ularni reabilitatsiya va reintegratsiya qilish borasidagi mintaqaviy va xalqaro sa’y-harakatlarga bag‘ishlandi.

Konferensiya doirasida Huquqni muhofaza qilish akademiyasi tomonidan Ichki ishlar vazirligining Asosiy ekspert-kriminalistika markazi, kiberxavfsizlik sohasida yetakchi xalqaro kompaniya Group-IB, Oliy Majlis Qonunchilik palatasi huzuridagi Yoshlar Parlamenti bilan hamkorlik to‘g‘risidagi memorandumlar imzolandi. Shuningdek, xorijiy delegatsiyalar bilan bir qator ikki tomonlama uchrashuvlar o‘tkazilib, kelgusidagi hamkorlikning istiqbolli yo‘nalishlari muhokama qilindi.

Konferensiya huquqni muhofaza qilish sohasida ilmiy va amaliy muloqotni rivojlantirish, ilg‘or tajribalarni o‘rganish va innovatsion yechimlarni izlash uchun muhim xalqaro platforma bo‘lib xizmat qildi.

Tadbir materiallari va yakunlari maxsus to‘plam shaklida chop etilishi rejalashtirilgan.