Bosh prokuratura Akademiyasida ochiq eshiklar kuni

2019 yil 30 sentyabr kuni Bosh prokuratura Akademiyasida O'qituvchi va murabbiylar kuni hamda Akademiya magistraturasining ilk o'quv yiliga bag'ishlangan ochiq eshiklar kuni bo'lib o'tdi.

Tadbirda yurtimizning yetakchi ta'lim hamda ilmiy-tadqiqot muassasalari, Bosh prokuratura tarmoqlari vakillari, prokuratura organlari faxriylari, Akademiya bilan hamkorlik qilib kelayotgan xalqaro va milliy tashkilotlar, ommaviy axorot vositalari, Bo'lajak prokurorlar klubi a'zolari – TDYUU va Toshkentdagi Xalqaro Vestminster Universiteti talabalari, Akademiya xodimlari va ularning oila a'zolari, magistratura tinglovchilari, ularning ota-onalari hamda boshqa mehmonlar ishtirok etdilar.

O'zbekiston Respublikasi Bosh prokurori o'rinbosari E.T.Yuldashev Bosh prokuratura rahbariyati nomidan Akademiya professor-o'qituvchilarini kasb bayramlari bilan, magistratura tinglovchilarini o'quv yili boshlanishi bilan tabrikladi.

Shuningdek, Akademiyaga tashrif buyurgan mehmonlar, magistratura tinglovchilari va ularning ota-onalari tabrik so'zlari bilan chiqib, magistraturaga kirish imtihonlarining adolatli va shaffof o'tkazilganligini alohida e'tirof etishdi.

Bayram munosabati bilan, shuningdek prokuratura organlari xodimlarini tayyorlash, qayta tayyorlash va malakasini oshirish ishiga qo'shgan munosib hissasi uchun bir guruh Akademiya xodimlari faxriy yorliq, tashakkurnoma hamda esdalik sovg'alari bilan taqdirlandi.

Ochiq eshiklar kunida mehmonlar Akademiya kafedralari, bo'lim hamda markazlari faoliyati, shuningdek o'quv jarayoni hamda ilmiy-tadqiqotlarning tashkil etilishi bilan atroflicha tanishish imkoniyatiga ega bo'ldilar.

Xususan, Akademiya faoliyatiga oid videorolik namoyish etilib, Akademiya binosi bo'ylab ekskursiya tashkil etildi. Ekskursiya davomida mehmonlar sud protsessi imitatsiyasi xonasi, kriminalistika xonasi va poligoni, elektron tir va boshqa amaliy hamda vaziyatli mashg'ulotlar o'tkazish uchun maxsus jihozlangan xonalar, shuningdek Akademiya o'quv auditoriyalarini ko'zdan kechirishdi.

Mehmonlarda shuningdek elektron (masofaviy) o'qitish, voqea joyini virtual ko'zdan kechirish, Akademiya multimedia markazining imkoniyatlari qiziqish uyg'otdi.

Tadbir davomida qiziqarli badiiy va musiqiy dastur tashkil etilib, mehmonlar ishtirokida viktorina va tanlovlar o'tkazildi, g'oliblar esdalik sovg'alari bilan taqdirlandilar.