Активларни декларация қилиш институтини қонунчиликка жорий қилиш масалалари бўйича учрашув

Бош прокуратура томонидан янги тузилган Коррупцияга қарши курашиш агентлигига юклатилган вазифаларни бажаришга кўмаклашиш борасида ишлар давом эттирилмоқда.

Жумладан, “Давлат хизматчиларининг даромадлари, мол-мулки ва манфаатлар тўқнашувини декларация қилиш тўғрисида”ги қонун лойиҳасини ишлаб чиқиш учун Жаҳон банки ва БМТнинг Наркотик ва жиноятчилик бўйича бошқармасининг Ўзлаштирилган активларни қайтариш бўйича (“StAR”) қўшма ташаббуси доирасида Академияда амалга оширилаётган лойиҳа бўйича халқаро экспертлар жалб этилди.

Жорий йилнинг 2 сентябрь куни видеоконференцалоқа орқали халқаро экспертлар ёрдамида ишлаб чиқилган ушбу қонун лойиҳасининг концепцияси муҳокамасига бағишланган ишчи йиғилиши ташкил этилди.

Агентлик директори А.Бурханов иштирокида ташкил этилган учрашувда Жаҳон банки вакили Л.Поп, халқаро эксперт Д.Котляр, Бош прокуратуранинг тегишли бошқармалари вакиллари ҳамда Академия раҳбарияти ва ходимлари иштирок этди.

Тадбир доирасида қонун лойиҳасининг тузилиши, унинг асосий қоидалари, коррупцияга қарши курашга оид бошқа қонунлар билан ўзаро алоқаси муҳокама қилиниб, уни ишлаб чиқиш бўйича кейинги қадамлар белгилаб олинди.

Шунингдек, 3 сентябрь куни Академия вакиллари Агентлик томонидан мазкур қонун лойиҳасини ишлаб чиқиш бўйича ташкил этилган ишчи гуруҳнинг йиғилишида иштирок этишиб, унда концепция ва лойиҳага тааллуқли фикр-мулоҳазаларни билдиришди.