Рига олий ҳуқуқ мактабининг таълим дастурида иштирок этилди

Хорижий ўқув ва илмий-тадқиқот муассасалари билан академик мобиллик дастурларини кенгайтириш доирасида Ўзбекистон Республикаси Бош прокуратураси Академияси докторанти Б.Кадирова май-июнь  ойларида Рига олий ҳуқуқ мактабининг Марказий Осиё давлатлари учун мўлжалланган Европа ҳуқуқи, иқтисодиёти ва сиёсатини ўрганиш бўйича дастурида иштирок этди.

Ушбу дастурнинг мақсади давлат хизмати, нодавлат ташкилотлар вакиллари, олимлар ҳамда тадқиқотчилар учун Европа ҳуқуқи, иқтисодиёти ва сиёсати борасида илғор халқаро академик таълим беришга қаратилган.

Дастурда рақамлаштириш ва электрон бошқарув, қонун лойиҳаларини ишлаб чиқиш ва қонун устуворлигини таъминлаш, иқтисодий ривожланиш ва халқаро савдо, Европа Иттифоқининг институционал асослари, давлат сектори учун лойиҳаларни бошқариш ва асосий ҳуқуқлар (инсон ҳуқуқлари) каби 6 та ўқув модули доирасида машғулотлар ташкил этилди.

Ҳар бир модуль якуни бўйича иштирокчиларнинг ўзлаштирган билим ва малакалари ҳамда профессор-ўқитувчиларнинг фаолияти баҳоланди.

Таълим дастури доирасида Бельгияга сафар ташкил этилиб, Европа ташқи алоқалар хизмати, Европа парламенти, Европа комиссияси ҳамда Европа иқтисодиёти ва ижтимоий қўмиталари вакиллари билан учрашувлар ташкил этилди.

Дастур якуни бўйича тингловчиларга Рига олий ҳуқуқ мактаби магистратураси талабаси бўлиш имтиёзини берадиган махсус сертификатлар топширилди.