“Фуқаролик процессуал ҳуқуқининг долзарб муаммолари” мавзусидаги илмий-амалий конференция бўлиб ўтди

Ўзбекистон Республикаси Бош прокуратураси Академиясида юридик таълим соҳасида ўзининг мактабини яратган улуғ аллома, процессуалист олим Эминжон Эгамбердиевнинг 80 йиллиги муносабати билан “Фуқаролик процессуал ҳуқуқининг долзарб муаммолари” мавзусидаги илмий-амалий конференция бўлиб ўтди.

Тадбирда юридик соҳада фаолият юритаётган етук олимлар, академиклар, фан арбоблари, ёш тадқиқотчилар, Академия профессор-ўқитувчилари, докторантлар, магистратура тингловчилари ва жамоатчилик вакиллари иштирок этди. 

Конфренцияда юридик фанлар доктори, профессор Э.Эгамбердиевнинг юридик илм-фан борасидаги маънавий мероси ҳозирги кунда юридик соҳада кадрларни тайёрлашда, уларнинг малакасини оширишда ва бошқа кўплаб жабҳаларда муносиб ҳисса қўшиб келаётганлиги эътироф этилди.

Бевосита прокуратура органларида ҳам олим томонидан олиб борилган илмий изланишлар давом эттирилиб, фуқаролик суд ишларини юритишда прокурор иштироки, унинг зарурияти, прокурорнинг ҳуқуқий мақоми ва унинг ташкилий-ҳуқуқий асосларига бағишланган кўплаб илмий тадқиқотлар олимнинг бевосита прокуратура органларида ишлаётган шогирдлари томонидан давом эттирилмоқда.

Бош прокуратура Академиясида Судларда прокурор ваколатини таъминлаш кафедрасида “Фуқаролик суд ишларини юритишда прокурор ваколатини таъминлаш” ўқув модули доирасида прокуратура органлари ходимларининг малакаси ошириб келинмоқда.

Шу билан бирга Академияда 12.00.04 – “Фуқаролик процессуал ҳуқуқи. Иқтисодий процессуал ҳуқуқи. Ҳакамлик жараёни ва медиация” ихтисослиги бўйича Илмий кенгаш фаолияти ҳам йўлга қўйилиб, ҳозирда ўндан ортиқ прокуратура органлари ходимлари томонидан фуқаролик процессуал ҳуқуқи ва фуқаролик суд ишларини юритишда прокурор иштироки билан боғлиқ илмий тадқиқотлар олиб борилмоқда.

Конфренция якунлари бўйича фуқаролик процессуал ҳуқуқининг долзарб муаммолари, уларнинг ечимлари ҳамда қонунчиликни такомиллаштириш бўйича таклиф ва мулоҳазалар билдирилди.