БМТ Коррупцияга қарши конвенциясининг конференцияси модели ташкил этилди

Халқаро коррупцияга қарши курашиш куни муносабати билан ўтказилаётган ҳафталик доирасида жорий йилнинг 20 декабрь куни Академия томонидан Коррупцияга қарши курашиш агентлиги, Гиёхвандлик ва жиноятчилик бўйича бошқармаси ва “Минтақави мулоқот” ХННТ билан ҳамкорликда БМТнинг Коррупцияга қарши конвенцияси иштирокчи-давлатлари конференцияси модели: “Конвенцияни амалга ошириш механизми: иккинчи босқич обзори” тадбири ташкил этилди.

Тадбирда Тошкент шаҳридаги Халқаро Вестминстер университети, Самарқанд давлат университети, Бердақ номидаги Қорақалпоқ давлат университети, Тошкент давлат юридик университети, Жаҳон иқтисодиёти ва дипломатия университети, Судьялар олий кенгаши ҳузуридаги Судьялар олий мактаби, Ҳуқуқни муҳофаза қилиш академиясининг магистратура тингловчилари ролли ўйинлар шаклида Конвенция иштирокчи-давлатлари делегатлари сифатида чиқиш қилишди.

Конференцияда иштирокчилар икки босқичдан иборат бўлган тадбирлар орқали ўзаро ҳуқуқий билимларини синашди.

Биринчи босқич давомида иштирокчилар Корея Республикаси, Эстония, АҚШ (Массачуссетс штати мисолида), Чили, Қозоғистон, Нигерия ва Ўзбекистон давлатарининг шартли делегатлари сифатида ўзларининг давлатларида коррупцияга қарши курашишга ихтисослашган органларнинг Конвенциянинг 9-моддасига асосан бюджет маблағлари ва давлат харидларида шаффофликни таъминлаш бўйича ҳисоботларни тақдим қилишди, бошқа делегацияларнинг саволларига жавоб бериш орқали дебатларда қатнашишди.

Куннинг иккинчи ярмида иштирокчилар муҳокама қилинаётган масалалар бўйича таҳлилий солиштириш асосида Ўзбекистон қонунчилигини такомиллаштиришга қаратилган таклифлар юзасидан тақдимот ўтказишди.

Делегацияларнинг чиқишлари Коррупцияга қарши курашиш агентлиги, БМТ ГЖБ Марказий Осиёдаги минтақавий ваколатхонаси ва “Минтақавий мулоқот” ХННТдан жалб қилинган миллий ва халқаро даражадаги экспертлар томонидан баҳолаб борилди.

Ташкил этилган тадбир иштирокчиларнинг БМТнинг Коррупцияга қарши конвенцияси қоидалари бўйича билимларини оширишга, Конвенция бўйича обзор механизмларини ўтказишга ҳамда хорижий мамлакатлар ва Ўзбекистонда бюджет маблағлари ва давлат харидларида бошқаришда шаффофликни таъминлаш масалалари билан яқиндан танишишга имконият берди.