Раҳбар кадрларни касбий қайта тайёрлаш курси доирасида масофавий ўқув машғулотлари давом этмоқда

Айни дамда Академияда прокуратура органларида раҳбарлик лавозимларини эгаллаш учун заҳирада турган кадрларни қайта тайёрлаш курсига қабул қилиш танловининг биринчи босқичи доирасида тингловчилар масофавий таълим олмоқдалар.

Қайта тайёрлаш ўқув курсининг контенти тингловчиларнинг эҳтиёжларини инобатга олган ҳолда ишлаб чиқилган бўлиб, уларда билим ва кўникмаларни, жумладан, тизимли таҳлил ва танқидий фикрлашни, қонун устуворлигини таъминлашда  юксак адолат туйғусини ва масъулиятни шакллантириш ва мустаҳкамлашга қаратилган.

Ушбу ҳафтадаги ўқув машғулотлари судларда прокурор ваколатларини таъминлашнинг долзарб масалаларини ўз ичига олади. Мазкур ўқув модули доирасида суд-ҳуқуқ ислоҳотларини амалга ошириш, қонунчиликка киритилган сўнгги ўзгартиш ва янгиликлар, жиноят, фуқаролик, иқтисодий ва маъмурий суд ишларини юритишда прокурор ваколатини таъминлашга оид фаолиятни ташкиллаштириш, шунингдек, ҳуқуқни қўллаш амалиётида юзага келаётган муаммолар ва уларни бартараф этиш чораларини муҳокама қилишнинг долзарб масалалари бўйича ўқув машғулотлари назарда тутилган.