Академия фаолиятига хорижий эксперт жалб қилинди

Ўзбекистон Республикаси Президентининг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сонли Фармонига асосан ўқув жараёнига хорижий мамлакатлар етакчи олий таълим ва илмий-тадқиқот ташкилотларининг малакали мутахассисларини жалб қилиш Ҳуқуқни муҳофаза қилиш академия фаолиятининг асосий йўналишларидан бири ҳисобланади.

Академия ва “Минтақавий мулоқот” ХННТнинг Ўзбекистондаги филиали АҚШ Давлат департаменти кўмагида “Жиноий даромадларни легаллаштириш ва терроризмни молиялаштиришга қарши курашиш бўйича мураббийлик ва ўқитиш” дастурини ҳамкорликда амалга оширмоқда.

Дастур  Академия майдонида жиноий даромадларни легаллаштириш ва терроризмни молиялаштиришга қарши кураш фаолияти билан шуғулланувчи ҳуқуқни муҳофаза қилувчи орган ходимлари учун махсус ўқув дастурларини ишлаб чиқиш ва амалга ошириш орқали Ўзбекистоннинг жиноий даромадларни легаллаштириш ва терроризмни молиялаштиришга қарши кураш фаолияти соҳасида институционал, норматив-ҳуқуқий ва инсон салоҳиятини мустаҳкамлашга йўналтирилган.

Дастур норматив-ҳуқуқий база ва идоралараро ҳамкорликни илғор халқаро тажрибага мувофиқ такомиллаштириш бўйича экспертларни жалб қилишни назарда тутади.

Дастур доирасида жиноий даромадларни легаллаштириш ва терроризмни молиялаштиришга қарши кураш бўйича AҚШ Гиёҳвандликка қарши кураш бошқармасининг Молиявий тергов бўлимида иш тажрибасига эга, шунингдек, Саудия Aрабистони Гиёҳванд моддаларга қарши кураш бош бошқармасининг жиноий даромадларни легаллаштиришга қарши курашда салоҳиятини ошириш бўйича ўқув дастурида доирасида мураббий сифатида фаолият кўрсатган эксперт Ричард Джозеф Джойс (АҚШ) Академияга узоқ муддатли ўқитувчи-тренер сифатида жалб қилинди.

Мазкур дастур Ўзбекистон Республикаси Президентининг 2021 йил 28 июндаги ПФ–6252-сон Фармони билан тасдиқланган Ўзбекистон Республикасининг жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш миллий тизимини ривожлантириш стратегиясида назарда тутилган вазифаларни амалга оширишга қаратилган.