Диссертация ҳимояси бўлиб ўтди

Бош прокуратура Академияси ҳузуридаги Илмий кенгаш йиғилишида Академия докторанти Д.Ш.Ибрагимовнинг “12.00.07 – Суд ҳокимияти. Прокурор назорати. Ҳуқуқни муҳофаза қилувчи органлар фаолиятини ташкил этиш. Адвокатура” ихтисослиги бўйича “Вояга етмаганлар ҳақидаги қонунчилик ижроси устидан прокурор назоратини ташкиллаштириш ва унинг ҳуқуқий асосларини такомиллаштириш”  мавзусида юридик фанлар бўйича фалсафа доктори (PhD) илмий даражасини олиш учун тайёрлаган диссертациясининг ҳимояси бўлиб ўтди.

Мазкур тадқиқот доирасида вояга етмаганлар ҳақидаги қонунчилик ижроси устидан прокурор назоратини ташкил этиш механизмини такомиллаштириш, прокурор назоратини рақамлаштириш, шунингдек соҳада қонунийликни таъминлаш борасида прокуратура органлари ҳамда ваколатли давлат идоралари ўртасидаги ҳамкорлик алоқаларини мустаҳкамлаш масалалари ўрганилган.

Диссертацияда хорижий давлатларнинг илғор тажрибаси асосида Ўзбекистон Республикаси Фуқаролик кодекси, Маъмурий жавобгарлик тўғрисидаги кодекси, “Бола ҳуқуқлари тўғрисида”ги, “Прокуратура тўғрисида”ги Қонунлари ва бошқа бир қатор норматив-ҳуқуқий ҳужжатларга таклифлар илгари сурилган.

Диссертация ҳимояси натижасига кўра, Кенгаш аъзолари томонидан тадқиқотчи юридик фанлар бўйича фалсафа доктори (PhD) илмий даражасини олиш учун лойиқ деб топилди.

Академия жамоаси Диёрбек Ибрагимовни диссертацияни муваффақиятли ҳимоя қилганлиги билан табриклайди ва келгусидаги илмий ва касбий фаолиятида улкан зафарлар тилайди!