Раҳбар кадрларни касбий қайта тайёрлаш курсига қабул танловининг биринчи босқичи якунланди

Ҳуқуқни муҳофаза қилиш академиясида 2022/2023 ўқув йилида ташкил этилган прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсига қабул қилиш танловининг биринчи босқичи якунланди.

Танлов уч босқичдан иборат бўлиб, дастлабки босқичда 104 нафар номзод прокуратура органлари фаолияти йўналишлари ҳамда бошқарув асослари бўйича уч ойга мўлжалланган масофавий курсда ўқитилди.

Масофавий курсда иштирок этганларнинг ўртача балидан юқори балл тўплаган Бош прокуратура, Қорақалпоғистон Республикаси, вилоятлар, Тошкент шаҳар, Ўзбекистон Ҳарбий ва Транспорт прокуратуралари, шунингдек Бош прокуратура ҳузуридаги Департамент ва Мажбурий ижро бюросининг 44 нафар ходими иккинчи босқичга қабул қилинди. Шунингдек, биринчи босқични муваффақиятли якунлаган 66 нафар ходимга 144 соатлик малака ошириш курсини тамомлаганлиги ҳақида сертификат берилди.

Иккинчи босқичда номзодлар мамлакатимизда амалга оширилаётган ислоҳотлар, замонавий бошқарув, қарор қабул қилиш борасидаги билим ва кўникмаларини, шунингдек шахсий, ишчанлик сифатларини такомиллаштиришга йўналтирилган бир ойга мўлжалланган 36 соатдан иборат масофавий курсда ўқитилади.

Курс давомида номзодлар ўз тажрибаларидан келиб чиқиб, прокуратура органларининг тармоқ фаолиятини такомиллаштириш бўйича таҳлилий ишларни бажаришлари ва тақдимот қилишлари назарда тутилган.