Марказий Осиёда кибержиноятчиликка қарши курашиш салоҳиятини ривожлантириш бўйича II минтақавий мувофиқлаштирувчи йиғилишда иштирок этилди

Академия вакиллари 2023 йил 9-10 март кунлари Тошкент шаҳрида бўлиб ўтган “Марказий Осиёда кибержиноятчиликка қарши курашиш салоҳиятини ошириш” лойиҳаси бўйича иккинчи минтақавий мувофиқлаштирувчи йиғилишда иштирок этдилар.

Тадбир ЕХҲТнинг Ўзбекистондаги лойиҳалари координатори офиси томонидан ЕХҲТ Котибиятининг Трансмиллий таҳдидларга қарши курашиш департаменти (Вена) кўмагида ташкил этилди.

Тадбирда АҚШнинг Ўзбекистондаги элчихонаси “INL” директори Жек Андерсон, ЕХҲТнинг Ўзбекистондаги лойиҳалари координатори в.б. С.Сизов, ЕХҲТ Котибияти вакиллари М.Стикингс ва Ю.Носал, Ҳуқуқни муҳофаза қилиш академияси бошлиғи Е.Коленко, шунингдек, Марказий Осиё минтақаси давлатлари Бош прокуратура ва Ички ишлар вазирлигининг ихтисослаштирилган таълим муассасалари раҳбарлари, турли халқаро ташкилотлар ва хорижий давлатлар экспертлари иштирок этдилар.

Мувофиқлаштирувчи йиғилиш доирасида Ҳуқуқни муҳофаза қилиш академияси бошлиғи Е.Коленко кириш сўзи билан итирок этиб, ҳуқуқни муҳофаза қилиш органлари ходимлари учун кибержиноятчиликка қарши курашиш соҳасидаги таълимнинг долзарб масалаларини ёритиб, ЕХҲТнинг бу борадаги илғор тажриба ва амалиётини алоҳида таъкидлаб ўтди.

Иккинчи минтақавий мувофиқлаштирувчи йиғилиш вакиллари томонидан кибержиноятчиликка қарши курашиш ва Марказий Осиё ҳуқуқни муҳофаза қилиш органлари учун рақамли далиллар билан ишлаш бўйича таълим соҳасидаги асосий устувор йўналишлар ва эҳтиёжларни муҳокама қилинди.

Шунингдек, ҳуқуқни муҳофаза қилиш органлари ходимлари учун кибержиноятчилик ва рақамли далиллар билан ишлаш бўйича барқарор ва кенг қамровли таълимни таъминлаш борасида миллий шароитда ўқитишнинг энг самарали ёндашувлари ва усуллари кўриб чиқилди.

Ҳудудий мувофиқлаштирувчи йиғилиш ишининг якунлари бўйича ҳуқуқни муҳофаза қилиш органларида кибержиноятчиликка қарши курашиш соҳасида илмий ва таълим салоҳиятни ошириш, идоралараро ва халқаро ҳамкорликни мустаҳкамлашга йўналтирилган амалий тавсиялар қабул қилинди.

Тадбир сўнгида Қозоғистон Республикаси ва Қирғизистон Республикаси Бош прокуратураси ҳамда Ички ишлар вазирлигининг ихтисослаштирилган таълим муассасалари раҳбарлари ҳамда ЕХҲТ Котибияти вакиллари Ҳуқуқни муҳофаза қилиш академияси ва Ўзбекистон Республикаси прокуратураси тарихи музейига ташриф буюрдилар.

Мувофиқлаштирувчи йиғилиш вакиллари Академия киберлабораторияси, Рақамли криминалистика илмий-услубий маркази, АРМ имкониятлари, шунингдек, мамлакатимиз прокуратураси тарихи билан яқиндан танишдилар.