Словенияга ташриф буюрилди

Халқаро ҳамкорликни кенгайтириш, Академиянинг илмий-тадқиқот салоҳиятини мустаҳкамлаш, прокурор-тергов ходимларининг касбий тайёргарлигини ташкил этиш бўйича тажриба алмашиш мақсадида Ҳуқуқни муҳофаза қилиш академияси бир гуруҳ ходимларининг Словенияга ташрифи бўлиб ўтди.

Ташриф “Минтақавий мулоқот” ХННТ Ўзбекистондаги филиали ҳамда АҚШ Давлат департаментининг INL бюроси таклифи ва кўмагига биноан ташкил этилди.

Делегация аъзолари Словения Полиция академиясига ташриф буюриб, факультет декани А.Мали, Словения полицияси директор ёрдамчиси М.Ягер билан учрашдилар ҳамда ўқув жараёнини ташкил этиш, малака оширишнинг амалдаги тартиби, ўқув дастурлари ва бошқа масалаларни муҳокама қилдилар.

Шунингдек, Словения Суд-тиббиёт миллий лабораториясига ташриф уюштирилиб, дактилоскопия, ҳужжатлар суд-техник экспертизаси, гиёҳвандлик воситаларини аниқлаш ва бошқа лабораториялар фаолияти билан яқиндан танишилди.

Словения Миллий суд-тиббиёт лабораторияси директори ёрдамчиси Р.Прачек билан учрашувда делегация лаборатория тарихи, ташкилий тузилмаси, фаолияти ва инновацион лойиҳалари, экспертиза турлари билан яқиндан танишиб, шунингдек, амалиётда юзага келаётган муаммолар атрофлича муҳокама қилинди.       

Делегация Марибор университетида бўлиб, у ерда Жиноий адлия ва хавфсизлик факультети декани А.Сотлар ҳамда унинг ўринбосари И.Берник билан учрашди. Томонлар бакалавриат ва магистратура таълим йўналишлари бўйича таълим сифатини таъминлаш, диссертация тадқиқотлари ва уларни ҳимоя қилишни ташкил этиш, шунингдек, ўзаро манфаатли халқаро ҳамкорликни амалга ошириш масалаларини муҳокама қилдилар.

Любляна университети Криминология институтига ташриф давомида институт директори А.Заврсник ва бир гуруҳ ходимлар билан учрашув бўлиб, делегация аъзолари институт томонидан соҳада ҳуқуқбузарликларнинг олдини олиш, кибержиноятларни тергов қилиш, коррупцияга қарши курашиш ва инсон ҳуқуқларини ҳимоя қилишга оид олиб борилаётган тадқиқотлар билан танишдилар.

Учрашувлар якунлари бўйича томонлар ўзаро манфаатли ҳамкорликнинг устувор йўналишларини қайд этдилар.