"Аёллар ва кибержиноятчилик" халқаро давра суҳбатида иштирок этилди

Академия вакиллари "Аёллар ва кибержиноятчилик" мавзусидаги минтақавий давра суҳбатида онлайн форматда иштирок этдилар.

Тадбир Бирлашган Миллатлар Ташкилотининг Гиёҳванд моддалар ва жиноятчилик бошқармаси (БМТ ГЖБ)  Марказий Осиё бўйича минтақавий ваколатхонаси томонидан ташкил этилди.

Унда БМТ ГЖБ Марказий Осиё бўйича минтақавий вакили Ашита Миттал, БМТ ГЖБ маслаҳатчиси Алексей Фещенко, БМТ ГЖБ вакиллари Мари-Лайн Биллодаз, Наргис Азизова, Ўзбекистон Республикаси Ҳуқуқни муҳофаза қилиш академияси бошлиғи ўринбосари У.У.Нигмаджанов, Рақамли криминалистика илмий-услубий маркази катта прокурори Х.M.Гаджиев шунингдек, халқаро ташкилотлар вакиллари ва халқаро экспертлар иштирок этишди.

Маърузачилар гендер омилларини, жумладан, кибермакондаги аёллар ва болаларга нисбатан замонавий таҳдидларни, интернетдаги психологик зўравонлик технологияларини, яширин Darknet тармоғидаги бундай жиноятларни аниқлаш бўйича сўровларни ҳисобга олган ҳолда рақамли трансформация масалаларига тўхталди.

Шунингдек, Рақамли криминалистика илмий-услубий маркази катта прокурори Х.M.Гаджиев "Аёлларга нисбатан кибержиноятчилик ва зўравонликка қарши курашиш: Ўзбекистон тажрибаси" мавзусида маъруза қилди. Маъруза давомида кибермаконда аёллар ва қизларни шаъни ва қадр-қимматига қарши ҳужумлардан ҳимоя қилишнинг асосий ҳуқуқий, ташкилий ва услубий жиҳатлари кўриб чиқилди, ҳамда Академиянинг Рақамли криминалистика илмий-услубий маркази Киберлабораториясининг кибержиноятчиликка қарши курашиш ва ушбу турдаги жиноятлар бўйича рақамли далиллар билан ишлаш бўйича фаолияти очиб берилди.

Давра суҳбати якунида кибержиноятчилик ҳамда аёллар ва қизларга нисбатан зўравонликка қарши курашиш соҳасидаги салоҳиятни оширишга қаратилган назарий ва амалий тавсиялар илгари сурилди.