Навбатдаги малака ошириш курси якунланди

Ўзбекистон Республикаси Ҳуқуқни муҳофаза қилиш академиясида туман (шаҳар) прокурорларининг ва уларга тенглаштирилган прокурорларнинг  ёрдамчилари учун “Жиноий суд ишларини юритишда прокурор ваколатини таъминлаш самарадорлигини ошириш” мавзусида ташкиллаштирилган малака ошириш курси якунланди.

Мазкур малака ошириш курси аралаш таълим шаклида ташкил этилган бўлиб, масофавий таълим ва аудитория машғулотлари тарзида замонавий педагогик ва ахборот-коммуникация технологияларини қўллаган ҳолда ўтказилди.

Ўқув дастури Академия профессор-ўқитувчилари томонидан прокурорлик амалиётидаги долзарб масалалардан келиб чиққан ҳолда мавзу доирасидаги тақдимот материаллари, амалий мисоллар, тест ва казуслар ҳамда мультимедиа ўқув материаллари асосида ишлаб чиқилган ўқув машғулотлари асосида шакллантирилиб, бунда тингловчилар суд ишларини юритишда прокурор ваколатини таъминлаш фаолиятини тўғри ташкил этиш, иш юритишнинг ҳуқуқий асосларини ўрганиш, уларни қўллаш ва  прокурор томонидан тайёрланадиган процессуал ҳужжатларни асослантириш ҳақидаги билим ва кўникмаларга эга бўлишларига қаратилди.

Малака ошириш курси доирасидаги ўқув машғулотларида мамлакатда амалга оширилаётган суд-ҳуқуқ ислоҳотлари мазмун-моҳияти, қонунчиликка киритилган янгиликлар ҳамда ягона суд амалиётини шакллантириш масалаларига алоҳида аҳамият берилди.

Малака ошириш курсининг Академияда ўтказилган якуний босқичида  тингловчиларнинг масофадан ўзлаштирган билим ва кўникмалари бевосита аудитория машғулотлари жараёнида тренинг ҳамда ўқитишнинг интерфаол услубларидан фойдаланган ҳолда, муаммоли-вазиятли ҳолатларни таҳлил қилиш ва казуслар ечимини топиш воситасида мустаҳкамланди.

Малака ошириш курси якуни бўйича тингловчиларнинг курс дастурини ўзлаштириш даражаси баҳоланиб, сертификатлар топширилди.