Хорижий эксперт иштирокида Академиянинг илмий салоҳиятини ошириш бўйича семинар-тренинг

Академияда Бостон Ҳуқуқ мактаби (АҚШ) профессори Жоан Блюм иштирокида “Халқаро тан олинган юқори импакт факторли журналларда чоп этиш учун илмий мақола тайёрлаш” мавзусида семинар-тренинг ўтказилди.

Икки кун давом этган тадбирда илмий мақола тайёрлаш босқичлари, мақоланинг қоралама лойиҳасини ёзиш, уни таҳрирлаш, мақола мавзусидан келиб чиқиб чоп этиш мумкин бўлган юқори импакт факторли журналлар рўйхатини шакллантириш ва журнал таҳририятига мақолани тақдим этиш масалалари кўриб чиқилди.

Шунингдек, семинарда иштирокчилар мақола тайёрлашда тадқиқот саволини ишлаб чиқиш, мавзуга оид адабиётлар таҳлилини амалга ошириш, бунда Google Scholar, JSTOR, HeinOnline ва бошқа электрон ахборот ресурсларига мурожаат қилиш, мақолада фойдаланилган адабиётлар рўйхатини жамлаш, тартибга солиш ва иқтибос келтиришда Zotero – дастуридан фойдаланиш имкониятлари билан таништирилди.

Қизғин савол-жавоб тарзида ўтган семинар-тренинг иштирокчилар томонидан юқори баҳоланди. Тадбир якунида Академиянинг илмий ва академик салоҳиятини оширишга муносиб ҳисса қўшгани учун Жоан Блюмга миннатдорчилик билдириб ўтилди.