Ҳуқуқни муҳофаза қилиш академияси магистратурасига кириш имтиҳонлари бўлиб ўтди

2023 йил 16 август куни Академия магистратурасининг “Тергов фаолияти” йўналиши бўйича кириш имтиҳонлари бўлиб ўтди.

Магистратурага танлов ваколатли давлат органларида камида 3 йил хизматни ўтаган “Юриспруденция” бакалавриат таълим йўналиши бўйича таянч олий юридик маълумотга эга амалдаги ходимлари (ҳарбий хизматчилари) орасида ўтказилади.

“Тергов фаолияти” мутахассислиги бўйича 34 та ўринга номзодлар сони 157 нафарни ташкил этди. Ички ишлар вазирлиги тизими учун квота ҳудудлар кесимида белгиланган.

“Тергов фаолияти” мутахассислиги бўйича магистратуранинг кундузги шаклига ўқишга қабул қилинган ваколатли давлат органлари ходимларини ўқитиш бепул асосда амалга оширилади.

“Тергов фаолияти” мутахассислиги бўйича ўқишга қабул қилиш уч босқичдан, яъни тест шаклида ўтказиладиган махсус психологик танлов, ёзма имтиҳон (эссе) ва чет тилидан тест синовидан иборат.

Ёзма имтиҳон номзодларнинг мутахассислик фанлари бўйича таҳлил, ҳуқуқий манбалар билан мустақил ишлаш ҳамда ҳуқуқий масалалар бўйича хулосаларни баён этиш борасида қобилиятларини аниқлашга қаратилган.

Имтиҳонни ўтказишда янгича ёндашув жорий этилиб, унга кўра, мутахассислик фанлари бўйича ёзма имтиҳоннинг янада шаффоф ва холис бўлиши, бу борада номзодларга тенг имкониятларни яратиш мақсадида номзодлар орасидан танланадиган вакил томонидан битта билет танлаб олиниши ва барча номзодлар ушбу билетдаги 4 та саволдан исталган иккитасига жавоб ёзиши назарда тутилган.

Эссе мавзулари жиноят ҳуқуқи ва жиноят-процессуал ҳуқуқи фанлардан тузилган бўлиб, номзод ўз билим ва қобилиятларини тўлақонли намоён этиши учун имтиҳон билетидаги ўзига энг яқин бўлган мавзуни танлаш имкониятига эга.

Шунингдек, номзодларнинг чет тилларини билиш даражасини аниқлаш мақсадида тест синови ўтказилди.

Кириш имтиҳонини холис, очиқ ва шаффоф ўтказилишини таъминлаш мақсадида:

– чет тили бўйича тест саволларини тузиш, имтиҳонни ўтказиш ва жавобларини баҳолаш учун Ўзбекистон Республикаси Олий, фан ва ииновациялар вазирлиги ҳузуридаги Билим ва малакаларни баҳолаш агентлиги жалб қилинди;

– имтиҳон жараёни реал вақт режимида Ҳуқуқни муҳофаза қилиш академиясининг Фейсбукдаги расмий саҳифаси орқали онлайн тарзда трансляция қилинди;

– ҳар бир номзодга идентификацион рақам берилди ва имтиҳон жавоблари тўлиқ шифрланди.

Ёзма имтиҳон саволлари (эссе мавзулари) Академиянинг расмий веб-сайтида имтиҳон ўтказилишидан бир ой олдиндан эълон қилинган.