Коррупцияга қарши курашиш масалалари бўйича навбатдаги семинар ўтказилди

Академия томонидан “Ўзсаноатқурилишбанк” акциядорлик тижорат банкида “Тижорат банкларида коррупцияга қарши курашиш менежмент тизими” мавзусида семинар ташкил этилди.

Семинардан кўзланган мақсад банклар ўртасида коррупцияга қарши курашиш соҳасида ижобий тажриба алмашиш бўлиб, тадбирда “Ўзсаноатқурилишбанк” АТБ, давлат улушига эга банкларнинг масъул ходимлари, шунингдек Ҳуқуқни муҳофаза қилиш академияси, Коррупцияга қарши курашиш агентлиги ва Ҳисоб палатаси вакиллари иштирок этди.

Семинарда Академиянинг Коррупцияга қарши курашиш илмий-таълим маркази бошлиғи в.в.б. Х.Турсунбеков қатнашиб, коррупцияга оид ҳуқуқбузарликлар содир этилганлиги учун миллий қонунчиликда ҳамда халқаро тажрибада белгиланган жавобгарликлар, мамлакатимизда жавобгарлик муқаррарлигини таъминлаш бўйича амалга оширилаётган ислоҳотлар ҳақида атрофлича маълумот берди.

Тадбир якунида иштирокичлар банк тизимида коррупцияга қарши курашиш соҳасида тажрибалари билан маълумот алмашиб, экспертларнинг бу борадаги фикрлари билан танишиб олишди.