III Тошкент аксилкоррупция форумида иштирок этилди

Жорий йилнинг 3 ноябрь куни Академия раҳбарияти ва ходимлари Ўзбекистон Республикаси Коррупцияга қарши курашиш миллий кенгаши, Коррупцияга қарши курашиш агентлиги, БМТнинг Гиёҳвандлик ва жиноятчилик бўйича бошқармаси ҳамда бошқа халқаро ташкилотлар ҳамкорлигида ташкил этилган III Тошкент аксилкоррупция форуми ишида иштирок этишди.

Форумнинг очилиш маросими ва ялпи сессиясида Ўзбекистон Республикаси Олий Мажлис Сенати раиси ва Миллий кенгаш раиси Т.Нарбаева, Коррупцияга қарши курашиш агентлиги директори А.Бурханов, БМТ ГЖБнинг Марказий Осиёдаги Минтақавий Ваколатхонаси раҳбари Ашита Миттал, GIZ Ўзбекистондаги ваколатхонаси раҳбари Йоахим Фритц, АҚШнинг Ўзбекистондаги элчиси Джонатан Хеник, Европа Иттифоқининг Ўзбекистондаги элчиси Шарлотт Адриан ва БМТ Тараққиёт дастурининг Ўзбекистондаги доимий вакили в.в.б. Анас Карман чиқиш қилишди.

Ялпи сессия давомида БМТ ГЖБ ҳамкорлигида Марказий Осиёда БМТнинг Коррупцияга қарши конвенциясини амалга оширишни тезлаштиришга қаратилган Минтақавий платформани ишга тушириш маросими бўлиб ўтди.

Унда Қозоғистон Республикаси Коррупцияга қарши курашиш агентлиги, Қирғиз Республикаси Бош прокуратураси, Тожикистон Республикаси Давлат назорати молиявий ва коррупцияга қарши курашиш агентлиги ва Ўзбекистон Республикаси Коррупцияга қарши курашиш агентлиги раҳбарияти Минтақавий платформанинг аҳамиятини эътироф этишиб, виртуал тугмаларни босиш орқали унинг очилиши эълон қилишди.

Ялпи сессиянинг кейинги босқичида Ўзбекистонда коррупцияга қарши курашишга ҳисса қўшган ОАВ вакиллари, давлат идоралари, коррупцияга қарши курашиш бўйича ҳудудий кенгаш аъзоларини тақдирлаш маросими ўтказилди.

Ялпи мажлисдан сўнг Форум иштирокчилари коррупциянинг олдини олишда ахборотдан фойдаланиш, коррупцияга қарши курашувчи органларнинг давлат органлари фаолиятини мувофиқлаштириш ҳамда коррупцияга қарши таълим ва тарбия каби учта сессияларда иштирок этишни давом эттиришди.

Форумнинг “Коррупцияга қарши таълим ва тарбия – коррупциянинг олдини олиш механизмлари сифатида” номли сессиясида Ҳуқуқни муҳофаза қилиш академияси бошлиғининг биринчи ўринбосари Е.В.Коленко “Коррупциянинг олдини олишда илм-фан ва таълимнинг ўрни” мавзусида маъруза қилиб, Академиянинг ўтган даврда коррупциянинг олдини олишга қаратилган фаолияти доирасидаги ишлар бўйича батафсил маълумот берди.

Бундан ташқари, ушбу сессия ишида Малайзиянинг Коррупцияга қарши курашиш комиссияси Бош комиссари ўринбосари, Қатар Давлати Қонун устуворлиги ва коррупцияга қарши курашиш маркази директори, Европа Кенгашининг Иқтисодий жиноятчилик ва ҳамкорлик бўлими раҳбари, Иқтисодий ҳамкорлик ва тараққиёт ташкилотининг Ҳуқуқни муҳофаза қилиш бўйича лойиҳа раҳбари ҳамда Гонконг Коррупцияга қарши мустақил комиссиянинг Жамоатчилик билан алоқалар бошқармаси ходими тегишли маърузалар билан чиқиш қилишиб, ижобий тажрибалар билан ўртоқлашишди.

Форум миллий ва хорижий ҳамда халқаро иштирокчиларга мамлакатимизда коррупцияга қарши курашиш соҳасида амалга оширилаётган ислоҳотлар, истиқболдаги вазифаларни етказишга ҳамда фаолиятни халқаро стандартлар ва илғор тажриба асосида янада такомиллаштириш масалалари бўйича қизғин мулоқот ўтказишга имкон берди.