Ҳуқуқни муҳофаза қилиш органлари учун “Аёлларга нисбатан зўравонликка қарши курашиш” курсининг иккинчи босқичи бошланди

“Гендер зўравонликка қарши 16 кунлик фаол ҳаракатлар” халқаро кампанияси ҳамда Ўзбекистон Республикасида Инсон ҳуқуқлари бўйича Миллий таълим дастурини амалга ошириш доирасида Ҳуқуқни муҳофаза қилиш академияси томонидан Европа Кенгашининг юридик касб учун  HELP (Юридик касб учун инсон ҳуқуқлари бўйича таълим) дастури кўмагида ҳуқуқни муҳофаза қилиш органлари учун “Аёлларга нисбатан зўравонликка қарши курашиш” курси иккинчи босқичининг очилиши ташкил этилди.

Прокуратура органларида фаолият юритувчи 40 нафар терговчи курснинг тингловчилари ҳисобланадилар. Европа Кенгашининг миллий ва халқаро экспертлари иштирокида ишлаб чиқилган мазкур курс онлайн ва офлайн форматда ташкил этилган бўлиб, бу келажакда ҳуқуқни муҳофаза қилиш органлари манфаатдор ходимларини янада кенгроқ қамраб олиш имконини беради.

Курс дастури аёлларга нисбатан зўравонликнинг олдини олиш борасидаги асосий халқаро стандартлар, оилавий зўравонлик ва аёлларга нисбатан зўравонлик ҳолатлари бўйича халқаро ҳуқуқни қўллаш амалиёти ва Инсон ҳуқуқлари бўйича Европа судининг амалиётини кўриб чиқишни, Ўзбекистон Республикасида хотин-қизларга нисбатан зўравонликка қарши курашишнинг ҳуқуқий асослари ва бу борадаги ҳуқуқни қўллаш амалиёти ва бошқа масалалар қамраб олинган.

Курсни якунида иштирокчиларга халқаро сертификатлар топширилади.