Ўзбекистон ва Қатар ҳуқуқни муҳофаза қилувчи органлар ходимларининг малакасини ошириш борасида тажриба алмашиниш

Ҳуқуқни муҳофаза қилиш академияси раҳбарияти Бош прокурор бошчилигидаги Ўзбекистон делегацияси таркибида Қатар давлатига ташрифни амалга оширмоқда. Ташриф доирасида  2024 йил 23 январь куни Қатар Адлия вазирлиги ҳузуридаги Ҳуқуқий ва суд тадқиқотлари марказида учрашув бўлиб ўтди.

Учрашувда Қатарнинг Ҳуқуқий ва суд тадқиқотлари маркази директори доктор Салех Али Ал-Фадала (Dr. Saleh Ali Al-Fadala) Ўзбекистон делегацияси аъзоларини Марказ томонидан юридик кадарларни, шунингдек суд тизими ва прокуратура органлари ходимларини тайёрлаш ва малакасини ошириш фаолияти билан таништирди.

Академия бошлиғининг биринчи ўринбосари Е.В.Коленко қатарлик ҳамкасбларга ҳуқуқни муҳофаза қилиш органлари ходимларини тайёрлаш, қайта тайёрлаш ва малакасини оширишнинг сифат жиҳатдан янги тизимини жорий этиш жараёнлари, бунда таълим, илм-фан ва амалиётнинг уйғунлигини таъминлаш масалалари ҳақида батафсил маълумот берди.

Учрашув якунида Ҳуқуқни муҳофаза қилиш академияси билан Ҳуқуқий ва суд тадқиқотлари маркази ўртасида соҳа ходимларини тайёрлаш ва малакасини ошириш ҳамда юриспруденция ва ҳуқуқни қўллаш амалиётининг долзарб масалаларига оид қўшма илмий тадқиқотларни ўтказиш бўйича яқиндан ҳамкорлик ўрнатиш юзасидан чора-тадбирларни ишлаб чиқишга келишиб олинди.