Халқаро хотин-қизлар кунига бағишланган маданий-маърифий тадбир бўлиб ўтди

Ҳуқуқни муҳофаза қилиш академиясида “Қадриятлар уйғунлиги ва мутаносиблиги замонавий аёл тимсолида” мавзусида маданий-маърифий тадбир ташкил этилди.

Мазкур тадбирни ўтказишдан мақсад аёлни эъзозлаш, унга эҳтиром кўрсатиш ўзбек халқига хос олижаноб хусусиятлардан бири эканлиги, хотин-қизларнинг жамиятдаги ўрни ва мавқеини мустаҳкамлаш борасида давлат аҳамиятига молик ишлар амалга оширилаётганлигини кенг тарғиб қилишдан иборат. Зеро, жамиятда сиёсий, ижтимоий-маънавий муҳит барқарорлиги ва тараққиёти аёлларга, ёшларга, оилага бўлган муносабат ва эътибор билан боғлиқлиги муҳим аҳамият касб этади.

Анжуманда Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институти директори ўринбосари, Республика “Оқила аёллар” ҳаракати етакчиси, педагогика фанлари доктори, профессор О.Мусурмонова томонидан аёл ва унинг ўрни ва мавқеига оид маъруза тақдим этилди.

Шунингдек, тадбирда Ўзбекистон Миллий университетининг Оила ва хотин-қизлар масалалари бўйича ректор маслаҳатчиси, илмий кенгаш раиси, доцент Р.Рустамова, Республика маънавият ва маърифат маркази ҳузуридаги Ижтимоий-маънавий тадқиқотлар институти катта илмий ходими, фалсафа доктори (PhD), Ўзбекистон ёзувчилар уюшмаси аъзоси Ш.Ахророва ўзларининг маърузалари билан иштирок этишди.

Анжуманда хотин-қизларни ижтимоий-иқтисодий ислоҳотлар жараёнида фаоллигини ошириш, юксак маънавий фазилатларини мужассамлаштириш, миллий тафаккурни шакллантириш ҳамда  ёшларни маданий, тарихий анъаналаримизга ҳурмат, Ватанга муҳаббат, истиқлол ғояларига садоқат руҳида тарбиялаш, қизларни оилавий турмушга тайёрлаш, тадбиркорлик ва касб-ҳунарга ўргатиш бугунги куннинг долзарб масалаларига айланганлиги қайд этилди.

Конференция якунида жамиятда хотин-қизларнинг ҳар томонлама фаоллигини оширишга доир тавсиялар ишлаб чиқилди.