Ҳуқуқни муҳофаза қилиш академияси томонидан “Ватаннинг содиқ ёшлари” ўқув йиғинлари ўтказилмоқда

Ҳуқуқни муҳофаза қилиш академияси томонидан ёшлар учун махсус ишланган дастур асосида “Ватаннинг содиқ ёшлари” мавзусида ўқув йиғини ташкил этилди.

Мазкур ўқув йиғини доирасида пойтахтнинг барча туманларидан беш минг нафар ёшларнинг қамраб олиниши режалаштирилган.

Ўқув йиғини дастури ёшларни психологик таъминлаш, чет тилларни ўргатиш, касбга йўналтириш, бандликка кўмаклашиш, ҳуқуқий билимлар бериш, ватанпарварлик, Ватан тақдирига дахлдорлик, ўз юртига ва халқига муҳаббат туйғуларини сингдириш каби муҳим мақсадларга йўналтирилган.

Ўқув йиғинларининг илк машғулотлари жорий йилнинг 4 март кунидан бошлаб Тошкент шаҳрининг Бектемир тумани ёшлари учун ташкил этилди. Йиғин давомида ёшларни психологик тренинглар, чет тиллари ва жисмоний тарбия машғулотларига жалб қилинди. Машғулотлар Академиянинг юқори малакали мутахассислари томонидан интерактив методларни қўллаган ҳолда ўтказилди.

Ўқув йиғини якунида иштирокчиларга юртимизда ёшлар учун касб эгаллаш, билим олиш, тадбиркорлик фаолиятини амалга ошириш, хорижий тилларни ўрганиш ва бошқа йўналишларда давлатимиз томонидан бериладиган имтиёзлар ва имкониятлар ҳақида маълумотларни қамраб олган, Академия томонидан махсус ишлаб чиқилган қўлланма тақдим этилди.

Ўқув йиғинлари барча туман ёшлари билан давом эттирилади.