Кибержиноятларни жиноий таъқиб қилиш масалаларига бағишланган тренинг

Ўзбекистон Республикаси Ҳуқуқни муҳофаза қилиш академиясида Бош прокуратура, Давлат хавфсизлик хизмати ҳамда Ички ишлар органлари терговчилари учун “Кибержиноятларни жиноий таъқиб қилиш ва ўзаро ҳуқуқий ёрдам” мавзусида тренинг ташкил этилди.

Тренинг Буюк Британия Қироллик прокуратураси Терроризмга қарши курашиш бошқармаси Кибертерроризм билан боғлиқ жиноятларини тергов қилиш бўлими собиқ бошлиғи М.Кэррол иштирокида ўтказилди.

Тренинг дастури кибержиноятлар билан боғлиқ далилларнинг турлари, кибержиноятларнинг табиати билан боғлиқ жиҳатлар, халқаро суд жараёнларининг аҳамияти, халқаро тергов ва прокуратура стратегияси, бошқа юрисдикциялардан далилларни олиш, ўзаро ҳуқуқий ёрдам сўрови, терроризмнинг типологияси, террористик ҳаракатларни содир этишда интернет тармоғининг ўрни каби назарий ва амалий жиҳатларни қамраб олди.

Мазкур тренинг тергов соҳаси ходимларининг замонавий хавф-хатар ва чақириқларга оид билим ва малакаларини мустаҳкамлашга, уларни бартараф этиш борасида касбий компетенцияларини такомиллаштиришга хизмат қилади.

Машғулот якунида иштирокчиларнинг саволларига мутахассис томонидан батафсил жавоблар берилди.