Академия жамоасининг халқаро танловнинг саралаш босқичидаги ғалабаси

Халқаро гуманитар ҳуқуқ бўйича Ф.Ф. Мартенс номидаги ХХV юбилей танловининг саралаш босқичи натижаларига кўра, Ўзбекистон Республикаси Ҳуқуқни муҳофаза қилиш академиясининг “Феникс” жамоаси грант асосида танловнинг якуний босқичида иштирок этиш ҳуқуқини қўлга киритди.

Ф.Ф. Мартенс номидаги танлов – Халқаро қизил хоч қўмитаси (ХҚХҚ) томонидан талабалар учун ташкил этилган халқаро гуманитар ҳуқуқ  (ХГҲ) бўйича танловдир.

Бу йилги танловда иштирок этиш учун Россия, Арманистон, Озарбайжон, Белоруссия, Қозоғистон, Қирғизистон, Тожикистон, Туркманистон ва Ўзбекистондан 50 дан ортиқ ариза топширилган. Тадбир жорий йилнинг 22-26 апрель кунлари Москва шаҳрида бўлиб ўтади.

Мазкур танлов талабаларда ролли ўйинлар орқали имитация жараёнида, ҳақиқий ҳолатларга яқин бўлган вазиятларда халқаро гуманитар ҳуқуқни қўллаш кўникмаларини шакллантиришга қаратилган.

Танловнинг асосий йўналиши халқаро гуманитар ҳуқуқни қўллаш амалиётига қаратилган. Жамоалар ХГҲ ва халқаро оммавий ҳуқуқни билиш; қонун-қоидаларни амалда қўллаш қобилияти; ролли ўйинлар ва саҳналаштиришни тушуниш; ўз позицияси учун баҳслашиш қобилияти; жамоавий иш; ишлаш сифати ҳамда тасаввур қилиш каби мезонлар асосида баҳоланади.