Ўзбекистон Республикаси Ҳуқуқни муҳофаза қилиш академияси томонидан “Agrobank” акциядорлик тижорат банки билан ҳамкорликда банкнинг комплаенс бўлинмаси раҳбар ва ходимлари учун жиноий фаолиятдан олинган даромадларни легаллаштириш ҳамда терроризмни молиялаштиришга қарши курашиш масалалари бўйича малака ошириш семинари ташкил этилди. Ўқув дастури банк амалиётидаги замонавий хатарларни баҳолаш, шубҳали операцияларни аниқлаш ва ички назорат самарадорлигини оширишга қаратилди.
Семинар доирасида миллий қонунчилик талаблари ва ФАТФ халқаро стандартлари, манфаатлар тўқнашувининг олдини олиш, молиявий операциялар билан боғлиқ хатарлар, санкциялар доирасидаги чекловлар ҳамда шубҳали операцияларни аниқлаш мезонлари тизимли ёритилди. Банк амалиётида учрайдиган камчиликлар, уларнинг ҳуқуқий ва молиявий оқибатлари, шунингдек, бартараф этиш механизмларига алоҳида эътибор қаратилди.
Машғулотлар амалий йўналишда ташкил этилиб, халқаро стандартларни миллий амалиётга татбиқ этиш, таваккалчиликка асосланган ёндашувни кучайтириш ва мижозларни лозим даражада текшириш масалалари реал кейслар асосида таҳлил қилинди. Очиқ мулоқот ва савол-жавоблар иштирокчиларга мураккаб вазиятларни экспертлар билан биргаликда муҳокама қилиш имконини берди.
Соҳавий сессияларда Ўзбекистон Республикаси Марказий банки ҳамда Бош прокуратура ҳузуридаги Иқтисодий жиноятларга қарши курашиш департаменти мутахассислари иштирок этиб, илғор тажриба ва амалиётда қўлланилаётган самарали ёндашувлар билан ўртоқлашдилар.
Семинар якунлари бўйича иштирокчилар манфаатлар тўқнашувининг олдини олиш, ички назоратни самарали ташкил этиш, хатарларни баҳолаш, шубҳали операцияларни таҳлил қилиш ва комплаенс маданиятини мустаҳкамлашга доир амалий кўникмаларини ривожлантирдилар.
Мазкур ўқув лойиҳаси Академия ва банк сектори ўртасидаги амалий ҳамкорликни кенгайтириш, молиявий шаффофликни ошириш ҳамда банк тизимининг жиноий даромадларни легаллаштириш ва терроризмни молиялаштириш билан боғлиқ хатарларга қарши барқарорлигини мустаҳкамлашга хизмат қилади.