Ўзбекистон Республикаси Ҳуқуқни муҳофаза қилиш академияси томонидан Тошкент шаҳри, Тошкент ва Жиззах вилоятлари “маҳалла еттилиги” аъзолари учун ташкил этилган қисқа муддатли малака ошириш ўқув курслари доирасида аҳоли ўртасида кибергигиена қоидаларига амал қилиш ва кибертаҳдидлардан ҳимояланиш масалаларига бағишланган машғулотлар ўтказилди.

Машғулотлар давомида замонавий кибертаҳдидларнинг асосий турлари, шахсий маълумотларни ҳимоя қилиш, шубҳали ҳаволалар ва хабарларни аниқлаш, ижтимоий тармоқлар ҳамда мессенжерлардан хавфсиз фойдаланиш бўйича амалий тавсиялар берилди.

Шунингдек, кибербуллинг — ижтимоий тармоқлар ва бошқа рақамли платформалар орқали шахсга нисбатан тажовуз қилиш, қўрқитиш, ҳақоратлаш ва камситиш каби хатти-ҳаракатларда намоён бўлувчи ҳуқуқбузарликнинг янги кўриниши сифатида алоҳида муҳокама қилинди. Бундай ҳолатларни барвақт аниқлаш, уларнинг олдини олиш ҳамда аҳоли, айниқса ёшлар ўртасида рақамли хавфсизлик маданиятини оширишда “маҳалла еттилиги”нинг ўрни ва вазифаларига эътибор қаратилди.

Мазкур ўқув машғулотлари маҳаллаларда киберхавфсизлик бўйича профилактик ва таъсирчан тарғибот ишларини кучайтириш, фуқароларнинг кибертаҳдидларга нисбатан хабардорлиги ва ҳимояланиш кўникмаларини оширишга хизмат қилади.