2026 йил 21–22 сентябрь кунлари Ўзбекистон Республикаси Ҳуқуқни муҳофаза қилиш академияси томонидан Бош прокуратура ҳузуридаги Иқтисодий жиноятларга қарши курашиш департаменти ва Марказий банк билан ҳамкорликда АТБ «Микрокредитбанк»нинг ички назорат ва комплаенс хизмати ходимлари учун ташкил этилган малака ошириш курси доирасида икки кунлик ўқув машғулотлари ташкил этилди.

Машғулотларда Академия профессор-ўқитувчилари, Марказий банк ва Департамент мутахассислари жиноий даромадларни легаллаштиришга қарши курашиш, молиявий мониторинг ва коррупцияга қарши комплаенс масалаларини ёритди. Миллий қонунчилик талаблари ва ФАТФ тавсиялари, молиявий хавфларни баҳолаш, мижозларни лозим даражада текшириш, санкциявий чекловларга риоя этиш ҳамда шубҳали операцияларни аниқлаш амалий мисоллар асосида кўриб чиқилди.

Ўқув курсида БМТнинг Наркотиклар ва жиноятчилик бўйича бошқармаси экспертлари ҳам иштирок этди. Улар дроплардан фойдаланиб жиноий даромадларни легаллаштириш усуллари ва уларнинг фирибгарлик схемаларидаги ўрни, шунингдек, БМТнинг Коррупцияга қарши конвенцияси қоидалари асосида коррупцияга қарши комплаенсни ташкил этиш юзасидан амалий машғулотлар ўтказди.

Иштирокчилар банк амалиётидаги тизимли муаммолар ва уларнинг ечимларини муҳокама қилди. Ўқув курси ходимларнинг амалий кўникмаларини ривожлантириш, таваккалчиликка асосланган ёндашувни такомиллаштириш ҳамда жиноий даромадларни легаллаштириш ва терроризмни молиялаштиришга қарши курашиш чораларининг самарадорлигини оширишга қаратилди.