Ҳуқуқни муҳофаза қилиш академияси томонидан жиноят ишлари бўйича биологик далиллар билан ишлаш, уларни аниқлаш, қайд этиш ва қадоқлаш бўйича амалий кўникмаларни мустаҳкамлашга қаратилган ўқув-амалий семинар ташкил этилди.

Ўзбекистон Республикаси Президентининг 2026 йил 3 мартдаги ПФ-33-сон “Аёллар ва болалар ҳуқуқларининг ҳимоясини кучайтириш ҳамда уларга нисбатан тазйиқ ва зўравонлик ҳолатларининг олдини олиш бўйича қўшимча ташкилий-ҳуқуқий чоралар тўғрисида”ги Фармонига мувофиқ, 2026 йил 1 ноябрдан бошлаб жинсий эркинликка қарши жиноятлар бўйича терговга қадар текширув ва дастлабки терговни фақат прокуратура органлари томонидан амалга ошириш белгиланган.

Бундай жиноятлар бўйича тергов сифатини ошириш ва унинг шаффофлигини таъминлашга қаратилган вазифалар ижроси доирасида ташкил этилган семинарда Ҳуқуқни муҳофаза қилиш академиясининг “Тергов фаолияти” йўналиши битирувчи курс талабалари ҳамда Тошкент шаҳар прокуратура органлари терговчилари иштирок этдилар.

Машғулотларда Тошкент давлат тиббиёт университети Термиз филиалининг Патологик анатомия, суд тиббиёти, тиббиёт ҳуқуқи кафедраси ҳамда Ҳуқуқни муҳофаза қилиш академияси вакиллари иштирок этдилар.

Семинар давомида жиноят ишлари, хусусан, жинсий жиноятлар бўйича биологик объектлар билан ишлаш, биологик далилларни аниқлаш, қайд этиш ва қадоқлашда эътибор қаратилиши лозим бўлган жиҳатлар муҳокама қилинди.

Шунингдек, жиноятларни фош этишда тезкор маълумот алмашинувини таъминлаш, далилларни бузмасдан тўплаш ва расмийлаштириш масалаларига алоҳида эътибор қаратилди.

Амалий машғулотлар давомида иштирокчилар тергов фаолиятида юзага келаётган долзарб масалалар юзасидан фикр алмашиб, биологик далиллар билан ишлаш ҳамда тергов ҳаракатларини сифатли ташкил этиш бўйича амалий тавсияларга эга бўлдилар.

Мазкур ўқув-амалий семинар бўлажак терговчиларнинг амалий кўникмаларини мустаҳкамлаш, амалиётда фаолият юритаётган терговчиларнинг касбий маҳоратини ошириш ҳамда жиноятларни тергов қилиш сифатини оширишга қаратилган.