Ҳуқуқни муҳофаза қилиш академиясига МДҲ иштирокчи давлатлари солиққа оид (молиявий) тергов органлари раҳбарлари Мувофиқлаштирувчи кенгаши (КСОНР) мажлисида иштирок этаётган Арманистон, Қозоғистон, Қирғиз Республикаси ва Россия Федерацияси делегациялари ташриф буюрдилар.

Маълумот учун: КСОНР – МДҲ доирасидаги орган бўлиб, 1999 йил 20 октябрда давлатларнинг солиқ (молиявий) тергов органлари раҳбарлари қарори билан ташкил этилган. 2000 йил 30 ноябрда МДҲ Ҳукумат раҳбарлари кенгаши қарори билан КСОНРга МДҲнинг тармоқлараро ҳамкорлик органи мақоми берилган ва Кенгаш тўғрисидаги Низом тасдиқланган.

Учрашув давомида меҳмонларга Академиянинг асосий фаолият йўналишлари, ташкилий тузилмаси, шунингдек, прокуратура ва тергов органлари ходимларини тайёрлаш, қайта тайёрлаш ҳамда малакасини ошириш тизими ҳақида батафсил маълумот берилди.

Ташриф доирасида делегация аъзолари Академиянинг моддий-техник базаси, махсус ўқув хоналари ва илмий лабораториялари, жумладан, рақамли криминалистика лабораториялари билан танишдилар. Таълим жараёнига жорий этилган инновацион ёндашувлар ва илғор ўқитиш усуллари меҳмонларда катта қизиқиш уйғотди.