Ўзбекистон Республикаси Ҳуқуқни муҳофаза қилиш академиясига Европада хавфсизлик ва ҳамкорлик ташкилоти (ЕХҲТ)нинг Марказий Осиёда коррупцияга қарши курашиш, хавфсизлик секторини бошқариш ва ислоҳ қилиш бўйича лойиҳаларини амалга оширишга масъул вакиллари ташриф буюрди. Учрашувда меҳмонларга Академиянинг асосий фаолият йўналишлари ва қўшма лойиҳалар натижалари тақдим этилди.

Меҳмонларга Академиянинг ташкилий тузилмаси, прокуратура ва тергов органлари ходимларини тайёрлаш, қайта тайёрлаш ҳамда малакасини ошириш тизими ҳақида батафсил маълумот берилди.

ЕХҲТ вакиллари махсус ўқув хоналари ва илмий лабораторияларда бўлди. Уларга юридик клиника, ситуацион марказ, рақамли криминалистика лабораториялари ва Ахборот-ресурс маркази фаолияти, шунингдек, электрон таълим тизими ҳамда Коррупцияга қарши курашиш виртуал академиясининг имкониятлари намойиш этилди.

Ташриф дастури доирасида меҳмонлар ҳамкорликнинг амалий натижалари – ЕХҲТ билан биргаликда Академияда яратилган инфратузилма ва таълим ресурслари билан ҳам танишди.