Ўзбекистон Республикаси Ҳуқуқни муҳофаза қилиш академиясининг ишчи гуруҳи Тошкент вилояти Ангрен шаҳрининг «Озодлик» маҳалласида криминоген вазиятни ўрганди. Ҳуқуқбузарлик ва жиноятларнинг келиб чиқиш сабаблари ҳамда уларга имкон бераётган шарт-шароитлар таҳлил қилиниб, маҳаллада манзилли профилактикани ташкил этиш бўйича илмий асосланган таклифлар берилди.

Мазкур ўрганиш Ўзбекистон Республикаси Президентининг 2025 йил 3 январдаги ПҚ–1-сон қарорида белгиланган маҳаллаларда хавфсиз муҳит яратиш ва ҳуқуқбузарликларнинг барвақт олдини олиш вазифалари ижроси доирасида ўтказилди.

Таҳлил давомида маҳалладаги ҳуқуқбузарликларнинг ўзига хос хусусиятлари баҳоланди. Таклифлар аниқланган омиллар ва ҳудуддаги мавжуд вазиятни ҳисобга олган ҳолда ишлаб чиқилди.

Ангрен шаҳрида Академияга бириктирилган маҳаллаларда аввалги ўрганишлар асосида тайёрланган тавсиялар ҳозирда амалиётга татбиқ этилмоқда. Профилактика ишларининг натижадорлиги мунтазам баҳоланиб, кўрилаётган чораларнинг ҳуқуқбузарликлар ҳолатига таъсири ўрганилмоқда.

Ушбу ишларнинг давоми сифатида Академия «маҳалла еттилиги» аъзолари учун ўқув-семинарлар ҳам ташкил этмоқда. Машғулотлар маҳаллаларда профилактика тизимини мустаҳкамлашга қаратилган.