Ўзбекистон Республикаси Ҳуқуқни муҳофаза қилиш академиясида Бош прокуратура марказий аппарати ходимлари давлат тили бўйича анъанавий республика танловининг «Саводхонлик» йўналишида тест синовларида иштирок этдилар.

Прокуратура, Департамент ва Бюро органлари ходимлари ўртасида ўтказиладиган «Миллат она тили билан тирикдир!» танлови 2021 йилдан буён ташкил этиб келинмоқда. Танлов ходимларнинг нутқ маданиятини юксалтириш, давлат тилида саводли иш юритиш ҳамда ҳуқуқий атамаларни аниқ қўллаш кўникмаларини мустаҳкамлашга қаратилган.

Саралаш босқичида иштирокчиларнинг ўзбек адабий тилининг имло, талаффуз ва услубий меъёрлари, лотин ёзувига асосланган ўзбек алифбоси ва имло қоидалари, шунингдек, юридик терминология бўйича билимлари баҳоланди. Ҳуқуқий атамаларни тўғри қўллаш ва фикрни аниқ, тушунарли ҳамда саводли ифодалашга алоҳида эътибор қаратилди.

Тест натижаларига кўра, биринчи, иккинчи ва учинчи ўрин соҳиблари аниқланди. Биринчи ўринни эгаллаган иштирокчи танловнинг республика босқичига тавсия этилди.