Ҳуқуқни муҳофаза қилиш академиясига бириктирилган Ангрен ва Олмалиқ шаҳарларидаги саккиз маҳалланинг еттитаси «қизил» тоифадан чиқди: учтаси «яшил», тўрттаси «сариқ» тоифага ўтди. Бу натижа Академия ва Тошкент вилояти ҳуқуқни муҳофаза қилиш органларининг ҳамкорликдаги илмий-амалий ишлари ҳамда ишлаб чиқилган тавсияларни амалиётга татбиқ этиш бўйича кўрилган чоралар якунида қайд этилди.
Ўзбекистон Республикаси Президентининг 2026 йил 5 январдаги ПҚ–1 ва ПҚ–2-сон қарорлари ижроси доирасида Академия бошлиғининг ўринбосари А. С. Одинаев раҳбарлигидаги ишчи гуруҳ уч йилдан буён «қизил» тоифада бўлган мазкур маҳаллаларда комплекс ўрганишлар ўтказди. «Илмий хулоса – тавсия – натижа» тамойили асосида жиноятчиликнинг сабаб ва омиллари, ҳуқуқбузарликларга имкон бераётган шарт-шароитлар, ижтимоий-маиший муаммолар ҳамда профилактик чораларнинг қўлланилиши таҳлил қилинди.
2023–2025 йилларда содир этилган 176 та жиноят таҳлили асосида маҳаллалар учун амалий тавсиялар ишлаб чиқилди. Улар ташкилий ва криминологик чоралар ҳамда профилактика стратегияларини қамраб олган қўлланмада жамланиб, «маҳалла еттилиги» аъзолари ва тегишли штабларга тақдим этилди.
Академия томонидан жами 18 та услубий қўлланма ва тавсия тайёрланди. Уларда жиноятчиликнинг барвақт олдини олиш, криминоген вазиятни таҳлил қилиш, суриштирув ва тергов амалиёти ҳамда ҳуқуқий тарғибот масалалари ёритилди. Тан жароҳати билан боғлиқ жиноятлар, кибержиноятчилик ва онлайн фирибгарликнинг олдини олишга алоҳида эътибор қаратилди.
Илмий тавсияларни амалиётда қўллаш бўйича маҳалла ходимлари учун семинар-тренинглар ва қисқа муддатли малака ошириш курслари ўтказилди. Машғулотларда низоларни ҳал этиш, стрессни бошқариш ва ностандарт вазиятларда руҳий барқарорликни сақлаш бўйича амалий масалалар ҳам кўриб чиқилди.
«Маҳалла еттилиги» аъзоларининг касбий билимларини мустаҳкамлаш учун Quiz bot электрон дастури ва тестлар тўплами, ҳар бир вакилнинг функционал мажбуриятларини акс эттирувчи электрон чек-лист тайёрланди. Электрон воситалар вилоят прокуратуралари орқали маҳаллаларга юборилди. Криминоген вазиятнинг кундалик таҳлили асосида тайёрланаётган хулоса ва таклифлар эса профилактика чораларини жойларда аниқланган муаммоларга йўналтиришда қўлланилмоқда.
