“Соҳавий инглиз тилини ўқитиш муаммолари ва истиқболлари” мавзусида халқаро илмий-амалий конференция ўтказилди

2021 йил 31 май куни Ўзбекистон Республикаси Бош прокуратураси Академияси томонидан Ўзбекистон давлат жаҳон тиллари университети ҳузуридаги Ўзбекистон нофилологик олий таълим муассасалари инглиз тили ўқитувчиларининг ўзаро тажриба алмашиш гуруҳи (UzTESPING) билан ҳамкорликда “Соҳавий инглиз тилини ўқитиш муаммолари ва истиқболлари” мавзусида халқаро илмий-амалий видеоконференцалоқа режимидаги конференция ташкил этилди.

Тадбир Ўзбекистон Республикаси Президентининг 2021 йил 19 майдаги “Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида”ги қарорида белгиланган вазифаларни амалга ошириш мақсадида ўтказилди.

Тадбирда UzTESPING аъзолари, Варвик университети (Буюк Британия), Тошкент халқаро Вестминистер университети экспертлари, шунингдек соҳавий инглиз тилини ўқитиш бўйича халқаро даражадаги консультантлар иштирок этдилар.

Тадбир давомида иштирокчилар соҳавий инглиз тилини ўқитишнинг долзарб масалалари, соҳадаги тизимли муаммолар ва камчиликларни муҳокама қилиб, уларнинг ечимларига оид фикр алмашдилар.

Иштирокчилар Бош прокуратура Академиясида чет тилларини ўқитиш борасидаги тажриба ҳамда таълим жараёнида қўлланилаётган замонавий методикалар билан танишдилар.

Тадбир инглиз тилини ўрганишни оммалаштириш истиқболларига оид фикр ва тажриба алмашиш учун қулай имконият бўлиб хизмат қилди.

Конференция интерактив муҳокамалар тарзида бўлиб ўтди, якунлари бўйича иштирокчилар томонидан хорижий тилларни ўрганишни оммалаштириш юзасидан таклифлар ишлаб чиқилди, шунингдек UzTESPING доирасида ҳамкорликни янада мустаҳкамлашга қаратилган тадбирлар белгилаб олинди.