Ахборот хавфсизлиги соҳасида  KubanCSC – 2021 халқаро конференциясида иштирок этилди

Бош прокуратура Академияси раҳбарияти ва ходимлари Россия Федерациясининг Краснодар шаҳрида ахборот хавфсизлиги соҳасида  KubanCSC–2021 халқаро конференцияси ишида иштирок этдилар.

Конференцияда Бирлашган Араб Амирликлари, Колумбия, Танзания, Жанубий Африка Республикаси, Бахрейн, Ҳиндистон, Филиппин ва бошқа мамлакатлардан ахборот хавфсизлиги соҳаси мутахассислари (жами – 25 мамлакат вакиллари) қатнашди.

Тадбирда Россия Федерацияси Ташқи ишлар вазирлиги, Бош прокуратураси, ИИВ ҳамда Тергов қўмитаси вакиллари маъруза қилди.

Конференция ахборот-коммуникация технологияларидан фойдаланиб содир этилган жиноятларнинг олдини олиш ва уларни фош этиш борасидаги илғор тажриба ва ижобий амалиётларни кўриб чиқиш, ахборот хавфсизлиги соҳасида халқаро ҳамкорлик масалаларини муҳокама қилиш учун қулай имконият бўлиб хизмат қилди.

Конференция доирасида “Халқаро ахборот хавфсизлиги соҳасида янги таҳдидлар”, “Жиноий мақсадда АКТ қўллашга қарши кураш: халқаро ҳамкорлик истиқболлари” мавзуларида ялпи мажлислар, шунингдек “Халқаро ахборот хавфсизлиги: стратегиялар, битимлар ва янги ҳуқуқий моделлар”,  “Ахборот хавфсизлиги: кадрлар салоҳияти, таълим жараёнидаги янги амалиётлар”, “Ахборот хавсизлигини таъминлаш соҳасида халқаро ҳамкорлик” мавзуларида панель муҳокамалари, шунингдек “Ахборот хавсизлигини таъминлашнинг амалий жиҳатлари” семинари бўлиб ўтди.

Академия бошлиғи Е.В.Коленко АКТдан фойдаланиб содир этилган жиноятларнинг олдини олиш, мазкур соҳада ахборот алмашиш ва халқаро ҳамкорликни ривожлантириш масалалари муҳокамасига бағишланган “Жиноий мақсадда АКТ қўллашга қарши кураш: халқаро ҳамкорлик истиқболлари” ялпи мажлисида маъруза қилди.

“Ахборот хавфсизлиги: кадрлар салоҳияти, таълим жараёнидаги янги амалиётлар” сессиясида Академия ходимлари маъруза қилиб, ахборот хавфсизлиги соҳасида мутахассисларни тайёрлаш даражаси ва таълим сифатини ошириш, таълим дастурларини такомиллаштириш, давлат органлари ва бизнес тузилмаларда кадрлар салоҳиятини юксалтириш масалаларида алоҳида тўхталиб ўтдилар. 

Тадбир доирасида Академия раҳбарияти ҳамда хорижий экспертлар ўртасида бўлиб ўтган учрашувларда ахборот хавфсизлигини таъминлаш борасида ҳуқуқни муҳофаза қилиш органлари ходимларининг малакасини ошириш соҳасида Академиянинг илмий-таълим салоҳиятини юксалтириш мақсадида халқаро ҳамкорлик алоқаларини ривожлантириш борасида келишувларга эришилди.