Иқтисодий жиноятларга қарши курашиш департаменти ходимлари учун малака ошириш курси якунланди

Бош прокуратура Академиясида Бош прокуратура ҳузуридаги Иқтисодий жиноятларга қарши курашиш департаментининг инспекторлари учун “Электр, иссиқлик энергияси, табиий газ ва сув ресурсларидан ноқонуний фойдаланиш механизмларини аниқлаш ва бу турдаги ҳуқуқбузарликларни фош этиш усуллари” мавзусида малака ошириш курси ниҳоясига етди.

Малака ошириш курси тингловчилар 3 ҳафта давомида ишдан ажралмаган ҳолда масофавий таълим шаклида, 1 ҳафта давомида эса Академияда кундузги таълим шаклида ўқиши назарда тутилган аралаш таълим (1+1) шаклида ташкил этилди.

Ўқув курси дастуридан электр, иссиқлик, газ ва сув тармоқларига ноқонуний уланиш схемаларини аниқлаш бўйича тезкор тадбирлар ва текширувларни ташкил этиш, уларни бартараф этиш усуллари, жиноий фаолиятдан олинган даромадларни легаллаштириш ва терроризмни молиялаштиришга қарши курашиш масалалари бўйича назарий ва амалий машғулотлар ўрин олган.

Ўқув машғулотлари Академия профессор-ўқитувчилари билан бир қаторда Бош прокуратура ҳузуридаги Иқтисодий жиноятларга қарши курашиш Департаменти ҳамда тегишли вазирлик ва идораларнинг тажрибали мутахассислари томонидан ўтказилди.