Xalqaro hamkorlik yangi bosqichga chiqmoqda: Akademiya tomonidan muhim kelishuvlar imzolandi

O‘zbekiston Respublikasi Huquqni muhofaza qilish akademiyasi xalqaro akademik hamkorlikni kengaytirish borasida izchil ishlarni davom ettirmoqda.

«Raqamli transformatsiya davrida huquqni muhofaza qilish faoliyatidagi zamonaviy chaqiriq va tahdidlar» mavzusidagi xalqaro ilmiy-amaliy konferensiya doirasida Akademiya tomonidan yetakchi xorijiy oliy ta’lim muassasalari bilan yangi hamkorlik kelishuvlari imzolandi hamda o‘zaro hamkorlikning ustuvor yo‘nalishlari belgilab olindi.

E’tibor markazida – raqamli davrning zamonaviy chaqiriqlari va huquqni muhofaza qilish sohasida xalqaro hamkorlikni mustahkamlash masalalari turdi.

Xalqaro ishtirokning ko‘lami Akademiyaning global huquqiy muloqot maydoni sifatidagi yuksak nufuzini yana bir bor tasdiqladi: tadbirda AQSH, Belgiya, Belarus, Birlashgan Arab Amirliklari, Buyuk Britaniya, Kanada, Koreya, Latviya, Lyuksemburg, Singapur, Ozarbayjon, Ispaniya, Pokiston, Polsha, Portugaliya, Rossiya, Ruminiya, Sloveniya, Tailand, Tojikiston, Turkiya, Fransiya, Chexiya, Xitoy, Shvetsiya, Qirg‘iziston, Qatar, Qozog‘iston va Yaponiya kabi 30 mamlakatdan 120 nafarga yaqin ekspert va sohaviy tashkilotlar vakillari ishtirok etdi.

Konferensiya doirasida bir qator xorijiy ta’lim muassasalari rahbarlari bilan ikki tomonlama uchrashuvlar o‘tkazildi. Jumladan, Rossiya Federatsiyasi Prokuratura universiteti rektori I.Matskevich, Turkiya Adolat akademiyasi prezidenti B.Altun, Tojikiston Respublikasi prokuratura organlari xodimlari malakasini oshirish instituti direktori o‘rinbosari K.Barakatullo va N.I.Lobachevskiy nomidagi Nijniy Novgorod Milliy tadqiqot universiteti xalqaro faoliyat va tashqi aloqalar bo‘yicha prorektori A.Bedniy bilan hamkorlik masalalari muhokama qilindi.

Shuningdek, Akademiya va Rossiya Federatsiyasi Prokuratura universiteti o‘rtasida 2025–2026-yillarga mo‘ljallangan hamkorlik dasturi hamda N.I.Lobachevskiy nomidagi Milliy tadqiqot universiteti bilan hamkorlik to‘g‘risidagi kelishuvlar imzolandi.

Muzokaralar davomida tomonlar o‘zaro hamkorlikning yuksak darajasini qayd etib, ikki tomonlama munosabatlarni yanada chuqurlashtirishning ustuvor yo‘nalishlarini belgilab oldilar.