Krasnoyarsk shahrida Moliyaviy xavfsizlik bo‘yicha VI Xalqaro olimpiadaning final bosqichi ochildi. Bu yilgi dastur markazida moliyaviy xavfsizlik sohasida sun’iy intellektdan foydalanish va uning rivojlanishi bilan bog‘liq xavflar turibdi.

O‘zbekiston delegatsiyasi tarkibida o‘n nafar talaba va sakkiz nafar maktab o‘quvchisi bor. Talabalarning to‘rt nafari O‘zbekiston Respublikasi Huquqni muhofaza qilish akademiyasida tahsil oladi. Ular final sinovlarida moliyaviy va axborot xavfsizligi sohasidagi bilimlarini namoyon etadi.

Final Sibir federal universiteti bazasida o‘tkazilmoqda. Unda 40 dan ortiq mamlakatdan qariyb 700 nafar maktab o‘quvchisi va talaba ishtirok etmoqda. Musobaqalardan tashqari, dasturga yuzdan ortiq tadbir – panel munozaralari, mahorat darslari va ekspertlar bilan uchrashuvlar kiritilgan. Final bosqichi 2 oktabrga qadar davom etadi.

Akademiya talabalari uchun bu xalqaro musobaqada bilimlarini qo‘llash hamda olimpiada ishtirokchilari va ekspertlari muhokama qilayotgan moliyaviy tahdidlarga qarshi kurashish yondashuvlari bilan tanishish imkoniyatidir.